కలిస్తే..సంచలనమే!

కలిస్తే..సంచలనమే!

   Judagiri |Updated | February 17,2016..

ముద్దపప్పు ఆవకాయ్‌... అదిరిపోయే కాంబినేషన్‌.ఉప్మా పెసరెట్టు... కమ్మటి కలయిక!వానాకాలం... మిరపకాయ్‌ బజ్జీ... చక్కటి జోడీ!సాయంత్రం... సముద్రపు హోరు - రొమాంటిక్‌ మిక్సింగ్‌.సినిమాల్లోనూ అంతే! కొన్ని కలయికలు టైటిల్స్‌ పడకముందే సూపర్‌ హిట్‌. ‘అసలు ఆ కాంబినేషన్‌లో సినిమా వస్తేనా...?’ అంటూ జనాలు రకరకాలుగా మాట్లాడేసుకొంటుంటారు. సినిమా ఎప్పుడొచ్చినా టికెట్టు తెగిపోవడం ఖాయం. రికార్డులు హోరెత్తడమే బాకీ. ప్రస్తుతం తెలుగు చలన చిత్ర పరిశ్రమలో కొన్ని కాంబినేషన్లు వూరిస్తున్నాయి. ‘వచ్చేస్తున్నాం... కాచుకోండి’ అంటూ కవ్విస్తున్నాయి. ఆ సినిమా ఎప్పుడు మొదలైనా, ఎప్పుడు విడుదలైనా సంచలనాలు సృష్టించేస్తాయని సినీ జనాలు ఇప్పట్నుంచే ముచ్చట్లలో పడిపోయారు. మరి అలాంటి కలయికలేంటి? వాటి కథేంటి? ఓ లుక్కేద్దాం.

---

తరవాత ఇదేనా?
ఎన్టీఆర్‌కి తొలి హిట్‌ ఇచ్చింది... ఎస్‌.ఎస్‌.రాజమౌళినే. ‘స్టూడెంట్‌ నెం.1’తో ఎన్టీఆర్‌ బలాలేమిటో మాస్‌కి అర్థమయ్యేలా చెప్పారు రాజమౌళి. ఆ తరవాత ‘సింహాద్రి’తో తారక్‌ ఎక్కడికో వెళ్లిపోయాడు. ఎన్టీఆర్‌ సినిమా హిట్‌ అయితే రికార్డులు హోరెత్తడం ఖాయమని ‘సింహాద్రి’ నిరూపించింది. ‘యమదొంగ’లో ఎన్టీఆర్‌ యముడిగా అదరగొట్టేసిన సంగతి మనకింకా గుర్తే. ‘ఎనీ డౌట్‌’ అంటూ యమలోకంలో ప్రకంపనాలు సృష్టించాడు. పౌరాణిక పాత్రల్లో ఇమిడిపోయే నటుడు తానే అని ఈ ‘యమదొంగ’ ఢంకా భజాయించి చెప్పాడు. దాంతో ఈ జోడీకి హ్యాట్రిక్‌ దక్కింది. అప్పటి నుంచీ ఎన్టీఆర్‌ - రాజమౌళి ఎప్పుడు కలుస్తారా అంటూ... సగటు సినీ అభిమాని ఎదురుచూపుల్లో పడిపోయాడు. ‘రాజమౌళి ఎప్పుడంటే అప్పుడే..’ అంటూ తారక్‌ కూడా చెబుతూ వచ్చాడు. ఇప్పుడు ఈ కాంబినేషన్‌ మరోసారి పట్టాలెక్కే అవకాశాలున్నాయన్న గుసగుసలు వినిపిస్తున్నాయి. రాజమౌళి ‘గరుడ’ అనే కథని సిద్ధం చేశారు. అది ఎన్టీఆర్‌ కోసమే అని సమాచారం. ‘బాహుబలి 2’ తరవాత రాజమౌళి ఈ చిత్రాన్నే తెరకెక్కించే అవకాశాలున్నాయని తెలుస్తోంది.